19

02/2024

18

17

16

15

14

13

12

11

10

9

8

7

6

5

4

3

2

1

الوادي كان مبين مثل بحيرة كبيرة. المي كمان شوي راح تفيض عن السد

أبعد من السد

اتصلت علي سيرين حكتلي انه لازم بسرعة نلحق الوادي قبل ما تنشف عنه المي. كان صارلها اسبوع عم تشتي، فيعني الوادي أكيد ملان مي، بالذات عند منطقة سد مستعمرة بيت زايت. 

حطينا برامجنا ع جنب ونزلنا ع الوادي. صفينا جوا مستعمرة بيت زايت، وين دايما بنصف ع الطريق الترابية اللي عند حظيرة الحصن والغنم اللي تابعة للمستعمرة، دايما ريحتهم بتكون طالعة. اليوم بس شفتهم تذكرت اللي حكتلنا اياه الحجة آمنة عن أبقار قالونيا وعن حليبهم. وين كانوا يبيتوا هالبقرات ووين كانوا يرعوا؟ سألت حالي. 

من فوق من عند الحظيرة، الوادي كان مبين مثل بحيرة كبيرة. المي كمان شوي راح تفيض عن السد. نزلنا باتجاه الوادي ومشينا على تلاه. كنت متحمسة كثير اشوف كيف شكل الغابة الطبيعية اللي بعد السد اليوم. اكيد منعنشة وخضرا. ورد الحنون وعصا الراعي معبيين الأرض، والسويد بلش يطلع عليه الورق ومخبّي أشواكه. على يمينا كان الوادي وعلى شمالنا سناسل شبه مهدمة وركام حجار. يا ترى هاد ركام شو؟ بيت الناطور؟ ولا مصايف القرية؟ 

الزيتون وين ما كان، بس زمان ما حدا قلّمه وصاير مثله مثل البلوطة، الاثنين جزء من غابة كبيرة من النباتات والشجيرات والأشجار البرية. معقول هاي الأرض اللي فيها النباتات اليوم كلها متشابكة ومتعربشة على بعض كانوا يحرثوها زمان ويمشوا عليها حافيين زي ما كانوا يحكولنا؟ 


يا ريت لو حد يحكيلنا شو قصة هاي الطريق، هاي النبتة وهاد الحجر. على أرض مين عم منمشي، وماسورة المجاري الكبيرة هاي طالعة فوق سنسلة لمين؟ الزيتونة العتيقة اللي جذعها محفور من جوا اكم جيل عاشرها وشرب من زيتها؟ وقديش صار لثمارها عم تسودّ وبتوقع ع الأرض بدون ما حدا يجدها؟

نزل شتا ناعم خفيف علينا واحنا نمشي بين السناسل. احتمينا تحت خروبة، عالأغلب انها ذكر لأنه ما كان في ثمار واقعة تحتها. 

آخر نقطة وصلنالها قبل ما نلف ونرجع كان مبنى ضخم بنص الوادي طالع منه دخنة. لما فتحت الخارطة أشوف شو هو كان مكتوب عليه "ميكوروت- محطة عين كارم" بالعبري. شو بتعمل شركة المياه الاسرائيلية بالوادي؟ سؤال جوابه يمكن بديهي: بتضخ مية الوادي للمستعمرات أول بأول. لفينا ورجعنا وحاملين معنا سؤال دايما بنسأله لما نصطدم بجسم كبير مثل هيك بالوادي: ايش مخبي وراه؟ 

بالرجعة، كان في جنديين اسرائيليين واحد منهم شكله برتبة ضابط، عم بمشوا بالوادي. ايش ممكن يكونوا عم يعملوا هون ولوين رايحين؟ ليه في جنود بالوادي؟ بدولة استعمارية استيطانية مثل اسرائيل—ما في فرق بين المدني والعسكري—مش غريب تشوف الجندي بأي مكان، حتى بالوادي اللي أصلا محاط بالمستعمرات، عم يعسكر الحجر والشجر.